O Goberno local de Boiro propón para o seu debate e aprobación no pleno da Corporación deste xoves 28 a creación dunha comisión para a municipalización da Piscina Municipal e servizos deportivos da Cachada.
O obxectivo desta proposta é “facer un estudo para recuperar a xestión do servizo multiusos e que pase a xestionarse do xeito máis sustentábel e eficiente posíbel, dando prioridade á xestión directa”, sinalou o alcalde boirense, José Ramón Romero, engadindo que “nos últimos anos fíxose un gran traballo nas instalacións deportivas da Cachada para poder prestar o mellor servizo á veciñanza e o seguinte paso é o de xestionar os servizos que se prestan no complexo”.
A comisión que se pretende aprobar terá a función de redacción dunha memoria xustificativa relativa aos aspectos sociais, xurídicos, técnicos e financeiros da actividade económica e determinar a forma de xestión. Do mesmo xeito, esta comisión será a encargada de elaborar un proxecto de tarifas e regulamento de uso das instalacións.
O Concello lembra que neste momento as instalacións están a ser xestionadas de forma directa polo Concello de Boiro pero o obxectivo que se persegue coa creación desta comisión é ampliar os servizos deportivos, monitorado, cursos e actividades que se viñan realizando nas instalacións.
