20190626
Até 40 concellos de toda Galicia van ter acceso a medio millón de euros en investimento para mellorar as súas instalacións culturais. Esta é a contía de axudas que vén de publicar no DOG a Consellería de Cultura e Turismo: unha resolución de investimentos que dá prioridade aos termos municipais con menos poboación, procurando o “reequilibro territorial en materia de acceso á cultura”. Os Concellos da Pobra e Porto do Son están entre os beneficiados destas subvencións.
Todos os proxectos subvencionados deberán desenvolverse en espazos nos que teña lugar “unha programación estábel” de actividades culturais (bibliotecas, casas e pazos da cultura, locais e centros socioculturais, auditorios, casas da xuventude etc). Entre as actuacións que se levarán a cabo ao abeiro desta orde están as melloras nas instalacións, a supresión de barreiras arquitectónicas, a adquisición de equipamento audiovisual ou a compra de material escénico, entre outras.
No caso da provincia da Coruña, a partida achegada pola Xunta é de case 110.000 euros, os cales se repartirán entre os concellos de Bergondo, Touro, Boqueixón, Dodro, Lousame, Mañón, Porto do Son, Padrón, Pobra do Caramiñal, Narón, Miño, Malpica de Bergantiños e Oza-Cesuras.
A axuda máxima para cada beneficiario é de 30.000 euros, que en ningún caso poderá exceder o 90% do orzamento total do proxecto subvencionábel.
