Un accidente entre dous vehículos deixou dúas persoas feridas, unha delas un menor, que foi trasladado na aeronave. A outra persoa ferida, unha muller, foi evacuada nunha ambulancia.
Dez minutos despois das 13:00 horas de hoxe, unha persoa particular informaba ao 112 Galicia dun accidente con dous coches implicados na CG-1.5, quilómetro 27, á altura de Roo, en Noia. Aseguraba que non había persoas atrapadas no interior dos vehículos, pero si indicaba que había nenos nos coches que podían precisar asistencia.
Así, con estes datos, desde o 112 Galicia pasouse aviso ao Servizo de Urxencias Sanitarias de Galicia-061, aos Bombeiros de Boiro e á Garda Civil de Tráfico. Do mesmo xeito, foron informados os membros do GES da localidade, a Policía Local e o persoal de mantemento da vía.
Ata o lugar tamén se desprazou un helicóptero medicalizado cuxos facultativos atenderon no mesmo lugar ao cativo que resultou ferido.
Tras as primeiras valoracións aos feridos por parte dos profesionais sanitarios, os membros do GES comunicaron que resultaran feridas dúas persoas, un menor que foi trasladado na aeronave e unha muller que foi evacuada en ambulancia.
Con todo, foi preciso reestruturar a circulación ao tráfico no punto quilométrico afectado mentres os servizos de emerxencias traballaban na evacuación dos feridos. Non obstante, o persoal de mantemento confirmou que, sobre as dúas e media da tarde, o tráfico quedou totalmente restablecido.
