Dende a “Unidade Veciñal de Dodro” afirman coñecer a dificultade da limpeza de todos os núcleos rurais do concello, 26 en total, pero pensan que hai que ter un plan de actuación sobre os espazos públicos que sexa transparente. Así a formación política di que no seu programa electoral propuxo unha planificación da limpeza dos espazos públicos, dando prioridade a espazos educativos, e espazos comúns como son os parques infantís, pistas polideportivas, prazas das aldeas, etc.
Segundo a formación neste momento non hai un criterio, ao seu entender, de actuación sobre os espazos públicos e estase facendo todo en base ás festas de cada aldea.
Pensan que se teñen que dar prioridade aos parques públicos antes que, por exemplo, ás escolas que agora mesmo non teñen actividade, aos parques infantís das aldeas que mais nenos teñen e non só polos nenos senón pola nosa xente maior que os usa como lugares de lecer e socialización.
Unha das aldeas que mais veciños gañou e con moitos nenos foi Pexegueiro pero o seu parque infantil está impracticable coa vexetación ocultando os bancos e os xogos dos nenos.
Debido a unha política de instalación de parques infantís, en cada aldea, aínda que non tivesen usuarios, que fixo que se chegase a mais de 20 parques, en épocas do goberno do PP, agora é, din, moi difícil telos todos perfectamente acondicionados e entenden a dificultade por parte dos operarios do concello.
A “Unidade Veciñal de Dodro” pide o goberno do PSOE que elabore un plan de traballo e dar prioridade aos parques e espazos que sexan mais usados polos veciños para non ver como están limpos espazos que xa ninguén usa, que teñen que estar acondicionados igualmente, pero outros que son lugares de reunión habitual están en un estado lamentable
