Este xoves dará comezo (oficialmente) a Feira Artesanal e Mariñeira de Ribeira, Artemar. Será ás 21.00 horas na Casa do Concello, co pregón de apertura das actividades e o posterior espectáculo das Cantareiras da Asociación Amas de Casa de Ribeira.
A feira desenvolverase do 17 ao 20 de agosto co obxectivo de “animar e dinamizar o verán no municipio”, segundo fixo saber esta semana, na presentación da nova edición do evento, o rexedor Luís Pérez Barral, que engadiu que a feira contará novamente con postos de venda de artesanía e espectáculos culturais. A feira estenderase ao longo das zonas peonís facendo un percorrido integrado polas rúas de Galicia, Rosalía de Castro, Santa Uxía, Porta do Sol e praza do Concello. Nestas localizacións instalaranse postos venda de produtos de alimentación e artesanía, así como tamén obradoiros demostrativos de oficios como o das redeiras, actividades infantís e contacontos.
Durante a feira mariñeira celebraranse espectáculos nocturnos na praza do Concello, contando coa implicación de asociacións e artistas locais. O peche da feira será o domingo 20 cun sorteo ás nove e media na praza do Concello e o conxuro da queimada, con degustación gratuíta ata esgotar existencias.
