A exposición Momentos que se está a exhibir estes días no Centro Cultural Lustres Rivas foi visitada este xoves 19 de decembro por un grupo de nenas e nenos do CEIP de Carreira. O propio artista autor da mostra, Paco Casal, encargouse de mostrarlles os detalles máis relevantes das pezas que acubilla, explicándolles as técnicas de gravado máis populares e convidándoos a seguir o camiño da creatividade nas súas moitas manifestacións.
En Momentos, como lembraremos, achéganse preto de trinta obras variadas en canto a técnica e formato, moitas delas seleccionadas ou premiadas en certames como a Bienal José Luis Fernández, Certame Internacional de Gravado Fundación Pedro Vivanco da Rioxa ou no Premio Atlante de Gravado do Museo de Artes-Ribeira.
A exposición terá as súas portas abertas até o 4 de xaneiro. O autor das obras que acolle é o artista Paco Casal, ferrolán afincado en Aguiño. O artista, que comezou a a súa andaina pictórica en 1985, expón regularmente dende o ano 1990 e a súa obra ten sido recoñecida nunha manchea de eventos artísticos de pintura e gravado, con premios concretos ou coa elección das súas obras entre as escolmas finalistas, amais de engrosar un importante e senlleiro número de coleccións, tanto de particulares como de empresas e institucións públicas.
Momentos é a terceira mostra de Casal no Centro Cultural Lustres Rivas. A primeira foi en febreiro de 2015 (Realidades máxicas) e en xullo de 2016 participou nunha exposición conxunta co escultor rianxeiro Nuco Losada baixo o título A Galicia máxica.
