Este venres 14 de xullo rematou en Dodro o Campamento Deportivo de Verán que comezou o 3 de xullo da man do Concello.
A iniciativa puxo a disposición da rapazada local, neste tempo de vacacións, unha quincena de actividades físicas nas que tiveron ocasión de practicar tenis, sendeirismo, orientación, pádel, chave, bolo tradicional, busca de tesouros, etc.
As rapazas e rapaces puideron tirar proveito das distintas instalacións deportivas do concello de Dodro como o Complexo Deportivo de Lestrobe, o Campo de Fútbol de Chenlo, as Pistas Deportivas de Bexo, e tamén participaron nas rutas de sendeirismo das Aldeas de Riba e de Pensa Nao (a novela do escritor local Anxo Angueira que dá nome a un dos itinerarios literarios de Dodro) e puideron subir ao Monte da Pareira e contemplar plenamente a beleza da contorna.
Grazas a estes roteiros tiveron ocasión de visualizar unha das grandes xoias paisaxísticas da comarca: a riqueza ambiental do río Ulla ao seu paso polo concello.
