O Concello de Noia, a través da súa Área de Cultura, compartiu unha “emocionante novidade” para todos os amantes da escritura: a apertura do prazo para presentar contribucións literarias ao XXII Certame de Relato de Aventuras Antón Avilés de Taramancos. “Trátase”, engade o departamento de Cultura que dirixe José Pérez, “dunha oportunidade única para mostrar o voso talento literario nun concurso de renome internacional e onde haberá un premio de 3.000 euros”.
As obras, que deberán ser do xénero de aventuras (aínda que de temática libre) e en galego, deberán presentarse antes do 20 de outubro. Deberán ter unha extensión de entre 70.000 e 100.000 caracteres. Terán que enviarse ao seguinte enderezo: Concello de Noia, rúa Rosalía de Castro 2, 15200, Noia (A Coruña).
Como lembraremos, na edición XX do certame resolveuse premiar a Francisco Rozados, Rochi, natural de Forcarei (Pontevedra), pola súa obra Niscoventa, presentada baixo o pseudónimo Canteiro. A novela contaba a historia de dous integrantes dun brigada antifranquista de canteiros (o nome da obra é, de feito, o xeito de designar un paraugas na lingua dos canteiros, a lingua barallete). Polo que respecta á edición XXI, o xurado decidiu deixala deserta.
