O Concello de Boiro recibiu da Deputación da Coruña unha subvención para a limpeza de praias no ano 2023. O importe que lle corresponde é de 25.849,91 euros. Están a destinarse aos gastos de contratación dirixidos aos profesionais que se encarguen da posta a punto dos areais do municipio durante o verán. Fontes do Consistorio poñen o foco na importancia de reforzar este servizo, xa que o concello conta cunha ampla extensión de costa con areais con ocupación alta durante a época estival como son Carragueiros, Barraña, Mañóns, Ladeira do Chazo, Retorta ou Ribeira Grande.
O Concello tamén recorda que o persoal contratado mediante esta subvención comezou xa os traballos nos areais de recollida manual dos residuos que se atopan nas praias e a recollida de algas, así como o baleirado das papeleiras que se van levar a cabo ata o 11 de setembro.
Ademais deste acondicionamento diario manual nos areais, o Concello de Boiro leva a cabo a limpeza mecánica das praias para eliminar os residuos traídos polo mar e depositados na superficie areosa. Tamén se están a levar a cabo as tarefas de roza das zonas verdes próximas aos areais e o acondicionamento das zonas destinadas aos servizos de praias.
No mes de xullo comezou tamén o servizo de socorrismo nos areais, cun total de sete socorristas que prestan servizo nas praias de Carragueiros e Barraña.
