Con puntualidade deuse a saída, desde as inmediacións do Club Náutico e Deportivo de Riveira, á XXIII Regata Ramiro Carregal Rey, organizada polo Real Club Náutico de Portosín coa colaboración da entidade deportiva arousá.
A previsión inicial no meteorolóxico non era moi halagüeña, tendo en conta a encalmada na mar do venres e a sufocante calor que a acompañaba. Pero a bruma que apenas deixaba entrever Sálvora,
comezaba a insuflar unha suave brisa mariña que foi en aumento, cubrindo en apenas uns minutos toda a Ría de Arousa.
Aproveitando esta circunstancia no meteoro o Comité montou con rapidez a saída, para dar con puntualidade o bocinazo que poñía en marcha a XXIII edición dunha das regatas máis emblemáticas da comarca do Barbanza.
Por diante 22 millas náuticas, preto de 40 km., entre Riveira e Portosín, que os veleiros máis rápidos cubrían en pouco menos de tres horas.
Xestión dos bordos no Paso de Sagres e trazados próximos a Corrubedo, as súas dunas e o mítico faro que lle dá nome á cita velística como Gran Trofeo Faro de Corrubedo.
Magna visita neste primeiro percorrido dun invitado especial como é o WOR60 Tokyo II, xemelgo do Galicia Pescanova que patronease o mítico Javier da Gándara na súa participación na Volta ao Mundo, máis coñecida como Whitbread Round the World Race. O Tokyo ía gobernado por Luís Jaime Álvarez, baixo grímpola de Cabo de Cruz.
Con esta premisa, a Clase Regata domínaa o Siradella, o barco local de Portosín armado por César Álvarez e Francisco Gude. O segundo posto é para o Corsario, de Jorge Durán, do Club de Iates de Vilagarcía,
mentres que o bronce deste primeiro día adxudícallo o Moucho, de Daniel Ayaso, do Club Náutico Deportivo de Riveira.
En Cruceiro/Regata manda o Bon III, de Víctor Carrión, representante do club anfitrión de Portosín. No segundo banzo figura o Ziralla Primeiro, de Ramón Barreiro, do Ro Yacht Club, que se marcou
unha gran regata. E terceiro o Kanala, tamén de Portosín, armado e patroneado por Ignacio Ecenarro.
Respecto a a Clase Cruceiro o líder é o Cámping Ría de Arousa, de José Manuel Pombar, do Club Náutico Arousa Norte, que soubo xestionar moi ben o seu paso por Sagres. Séguelle o Galopín, de Manuel Franco, do Náutico de Riveira, sendo terceiro o Orlando, de Gerardo Sánchez Brunete, do Ro Yacht Club.
A xornada do domingo depara aos regatistas a dinámica das probas ao vento, os bastóns que con axilidade terán que saber dominar para non perder fol na clasificación ou subirse a algún dos banzos
do podio en cada Clase. O Comité da Regata ten a intención de celebrar dúas destas probas barlovento-sotavento, na propia Ría de Muros e Noia.
Ás cinco da tarde está prevista a entrega de premios que contará coa participación de Ramiro Carregal Rey.
Foto Juan Caballero
