O Centro Náutico Municipal Francisco Rama Vázquez Fufú, emprazado na Ribeira do Freixo (Outes) compartiu a súa axenda de actividades formativas para este verán. A axenda inclúe cursos de vela e windsurf de iniciación e perfeccionamento, a desenvolver entre o 3 de xullo e o 1 de setembro.
As quendas serán semanais, de cinco días, de luns a venres. Haberá polas mañás nivel de iniciación-infantil (10 prazas por quenda) e polas tardes nivel de perfeccionamento, con 12 prazas por quenda.
O centro tamén ofrece este verán diferentes servizos complementarios, como por exemplo o alugueiro de embarcacións (de martes a sábado pola mañá e pola tarde), o alugueiro de kaiaks de mar (de martes a sábado, pola mañá e pola tarde) e tamén un servizo de varada de material de windsurf e de kaiak de mar (os usuarios poden facer uso do almacenamento do seu propio material de navegación, ter seguridade e apoio dunha embarcación pneumática así como acceso aos vestiarios e ás duchas e realizar reparacións de mantemento nos seus equipos).
