A Xunta de Galicia, a través da Consellería de Infraestruturas e Mobilidade, volve lanzar en 2023 o programa EBici, dirixido ao fomento do uso de bicicletas eléctricas con pedaleo asistido e de bicicletas de man híbridas ou eléctricas para cadeiras de rodas, mediante unha liña de subvencións para a súa adquisición.
As axudas xa se poden solicitar e hai máis de 100 establecementos adheridos, media ducia deles na nosa comarca. Estes bonos pódense pedir ata o 15 de novembro ou ata que se esgoten os fondos de 1,7M€ previstos. Polo Barbanza participan os seguintes puntos de venda: Bicis Quintena (Ribeira), E. Varela e Hijos (Rianxo), MC Bikes Noia (Noia), Sportbike Galicia (Ribeira), Electrodomésticos Caracas (Noia) e Electrodomésticos Otero (Boiro).
As subvencións do programa EBici están deseñadas para “fomentar o uso de bicicletas eléctricas ou bicicletas de man híbridas ou eléctricas, e facilitar a súa compra”. Deste xeito, favorecerase que os desprazamentos cotiás de curta distancia se realicen de forma sustentábel, reducindo as emisións de gases de efecto invernadoiro ao tempo que se rebaixa a contaminación acústica. Ademais, supón unha mellora na saúde das persoas ao promover a actividade ao ar libre e o exercicio físico.
