A Festa Hortera de Porto do Son, un dos grandes eventos charramangueiros do panorama galego e estatal, celebrarase novamente este verán, a primeira fin de semana de agosto (días 4 e 5) e cunha novidade importante no programa de actividades: unha homenaxe á cantante recentemente falecida Tina Turner que se reflectirá nas actividades convocadas e, tamén, nos atavíos de boa parte das persoas participantes.
“Non o dubidamos nin un segundo, en canto soubemos da despedida de Tina Turner (o pasado 24 de marzo en Suíza) tivemos claro que era necesario renderlle tributo”, informou a organización da festa dende as redes sociais, lembrando o carácter icónico da cantante, cuxas cancións e contribucións estéticas estiveron dende o comezo na cerna da festividade. De feito, o seu tema Simply the best acompaña algunha das fotos e vídeos máis icónicos da celebración (como se pode comprobar no seu Facebook). “Temos algo máis de 300 días para ir sacando as perrucas e preparando o brilli brilli”, sinalan os impulsores da festa, recordando a relevante contribución de Tina Turner á mesma.
