Os días pasados presentouse en Noia a nova edición (a número once) da Semana da Historia, que este ano vén cun programa fortalecido e ampliado de actividades e que está previsto que se celebre entre os días 6 e 13 de maio, no Teatro Coliseo de Noia e da man do Concello.
Segundo fixeron saber na presentación o escritor e historiador local Xerardo Agrafoxo e máis o concelleiro de Cultura, José Pérez, “trátase dunha axenda moi completa que tocará diferentes disciplinas, dende historia, arqueoloxía e arte, pasando por arquitectura e música, ata teatro, danza ou o mundo audiovisual”.
As xornadas darán comezo o sábado 6 ás 19.00 coa presentación da guía cultural Noia Terra Privilegiata, da man de Xerardo Agrafoxo. Nesta mesma xornada do sábado está prevista unha ruta polas rúas da vila (Noia) chamada Portus Apostoli, oficiada por Iria Caamaño (profesora de Socioloxía na Facultade de Turismo da UDC) e polo experto en visitas guiadas e teatralizadas Serafín Marcos.
Os días seguintes proseguirán as actividades cun percorrido pola orixe das parroquias de Noia, pola figura do arcebispo Xelmírez, polas cantigas de amor de Osorio Anes (trobador de Toxosoutos), pola torre e a porta da Peregrina e pola paisaxe urbana e a alimentación na vila medieval de Noia.
