A sociedade formada por unha decena de empresas vinculadas ao porto de Ribeira asumiu en 2017 de xeito temporal as rendas da lonxa de Ribeira. Agora o conglomerado empresarial, que se ramifica nunha firma administradora, Lonxa de Ribeira, e nunha vendeduría, Nova Lonxa de Ribeira, logrou ampliar a explotación do recinto de poxas durante os próximos 50 anos.
Desde a Consellería do Mar informaron que esta sociedade foi a única oferta que se presentou á convocatoria e detallaron que entre as actuacións que terá que acometer, tal e como figuraba no prego do concurso, atópanse deseñar e poñer en servizo un itinerario accesible á cafetería e aos restantes locais situados na primeira planta, poñer en funcionamento dous ascensores para garantir o acceso vertical de persoas e mercadorías, e poñer a punto os sistemas de seguridade.
