O concurso de música infantil e xuvenil Quero Cantar, impulsado pola Área de Cultura da Deputación da Coruña, xa ten finalistas. As seis solistas e grupos seleccionadas terán a oportunidade de interpretar os seus temas en directo na gala final, que terá lugar no Teatro Colón o 23 de abril, ás 18:30h.
Nesta gala, que estará presentada pola actriz e contadora Soledad Felloza, escolleranse ás formacións gañadoras e contará coas actuacións dunha banda e dunha solista convidadas: Bonhomía e Noelia Perpetuo, gañadoras da anterior edición deste concurso. A asistencia á gala final será de balde, previa retirada de convite na web do Teatro Colón.
As finalistas desta VI edición do Quero Canta ’ foron seleccionadas por un xurado composto por persoas vinculadas profesionalmente ao mundo da música como son Pablo Díaz, Paco Cerdeira, Laura Romero, Laura Iglesias e Carmen Rey Quintela. O xurado estivo presidido polo deputado de Cultura, Xurxo Couto, e actuou como secretaria a xefa do Servizo de Acción Social, Cultural e Deportes, Mercedes Fernández-Albalat. Tamén estivo presente, sen voz e sen voto, o comisario do concurso, Tono Formoso.
Convén lembrar que o Quero Canta’ contempla dúas modalidades: infantil (ata 12 anos con presenza dunha persoa adulta), e xuvenil (de 13 a 16 anos). Na gala final, o xurado estará composta por nenos e nenas e por mozos e mozas do mesmo abano de idade que as bandas e solistas seleccionadas para a final.
Finalistas na categoría infantil:
Guitarristas de Barouta é o grupo de guitarra do CEIP Barouta (Ames), e está conformado por alumnos e alumnas de Miguel Alonso. Foi nas súas aulas onde compuxeron a súa primeira canción, na que falan da inclusión no patio e nos xogos.
O Ritmo dos soños nace dentro do coro do CEIP de Caión (A Laracha) co obxectivo de se presentar ao concurso Quero cantar. A banda está formada por unha alumna e un alumno de segundo de primaria, unha alumna de terceiro, dous de quinto, seis de sexto e polo mestre de música do centro.
Os Termais son un grupo dun colexio de Cortegada, na comarca do Ribeiro. Está composto por compañeiros e compañeiras de cuarto, quinto e sexto de primaria. Indican que a escolla do nome provén da concentración de augas termais que se dá na zona, tendo Cortegada varios balnearios.
Finalistas na categoría xuvenil:
Raquel Barreiro é unha moza de 16 anos do concello de Ames que escribe as súas propias cancións. Estuda guitarra, canto e frauta traveseira. Xa participou no Quero Cantar, na categoría de primaria, en varias ocasións, chegando á final coa banda As estrelas do rock. Tamén pertenceu a outras bandas como Ramalloss ou Trece.
Euterpe é unha formación composta por alumnado de todos os niveis educativos do IES do Milladoiro (Ames) e coordinado polo profesor de música Manolo Maseda. Presentáronse ao Quero Cantar cun tema composto a partires dunha chuvia de ideas sobre as e os compoñentes da banda e as súas circunstancias vitais.
Temos Terras está formada por Alejandra Saavedra (guitarra e voz) de Teo e Lucas Arango (piano e voz) de Santiago de Compostela, ambos cunha ampla formación musical desde a infancia. Conformáronse como dúo musical no instituto.
