Os dous ocupantes, logo de precipitarse desde a Ponte, conseguiron saír polos seus propios medios do interior do vehículo e abandonaron o lugar. Segundo testemuñas do accidente deronse á fuga
Sucedeu na Ponte de San Antonio, na DP-6703, á altura da praia dos Areos, na Pobra do Caramiñal. Ás 17:45 horas deste domingo, varios particulares chamaban ao 112 Galicia para informar dos feitos. Segundo a información facilitada ao 112 Galicia polos alertadores, o vehículo, tras dar varias voltas de campá atropelou a un varón, deixándoo ferido, danou o valado da ponte e rematou no río. Ademais, indicaban que os dous ocupantes do vehículo conseguiran saír polos propios medios, xa que o río levaba pouco caudal, pero que abandonaran o lugar.
Ata o punto acudiron, nada máis ser informados polo 112 Galicia, o persoal do Servizo de Urxencias Sanitarias de Galicia-061, os Bombeiros de Ribeira, os axentes de Tráfico, da Policía Local e os efectivos da Agrupación de Voluntarios de Protección Civil da localidade.
Os bombeiros comunicaron ao 112 Galicia, que a persoa atropelada xa fora evacuada polos servizos sanitarios ao Hospital do Barbanza, e, a esta hora, agárdase por unha guindastre para retirar canto antes o coche do río e evitar que a perda de combustibles, debido ao impacto, poida causar algún tipo de dano.
