A Deputación da Coruña financia con 150.000 euros do Plan Único de Concellos as obras de mellora integral da Mirandela, na Pobra do Caramiñal. “Trátase dunha actuación moi demandada pola veciñanza da zona da Mirandela, na parroquia do Xobre”, explicaron fontes da entidade provincial, engadindo que as obras están xa en fase de licitación pública.
A orixe deste proxecto está na ampliación do devandito núcleo desde o 2008, trala aprobación do PXOM, que deu luz verde á creación de novos espazos urbanizábeis co conseguinte levantamento de edificacións “que carecen de servizos básicos como a recollida de saneamento, pluviais, alumeado publico ou pavimentación”, explicou a Deputación, que sinala que grazas ao Plan Único “procederase á ampliación dos servizos urbanos como saneamento, recollida de pluviais, abastecemento de auga e alumeado público en diversas zonas da Mirandela”.
Para completar a recollida de saneamento equiparase cun bombeo que permita dar servizo a aquelas vivendas que, atopándose a cota inferior á rede existente na actualidade, non é posíbel facelo por gravidade.
Nas zonas que xa existe alumeado público, pero con tendido aéreo, procederase a execución de canalización e novo cableado. Ademais, substituirase ou reporase o pavimento existente, usando na case totalidade da actuación o aglomerado asfáltico, e algunha pequena zona executarase con formigón.
O Plan Único leva investido na Pobra máis de 3,5 millóns de euros, financiado 26 obras e numerosos servizos públicos que melloran a calidade de vida da veciñanza.
