Con motivo do 8 de marzo (Día da Muller), a empresa da nosa comarca CONGALSA, referente galego, estatal e internacional en alimentación e innovación, acolleu nas súas instalacións un acto celebrado en colaboración coa Asociación Ámbar, poñendo en valor a relevancia de traballar pola independencia, autonomía e igualdade de oportunidades das mulleres con diversidade funcional.
Cinco integrantes de Ámbar (Mari Carmen Crugeiras, María Helena Oujo, Sonia Alonso, Mónica Rial e Sonia Piñeiro) repartiron na mañá deste mércores 8 de marzo, na sede da empresa, un obsequio corporativo simbólico a todo o persoal de CONGALSA, para conmemorar a celebración do Día da Muller.
Vinte anos de colaboración: accións conxuntas
CONGALSA e Ámbar manteñen unha estreita colaboración desde hai vinte anos. Ambas as entidades reúnense periodicamente para compartir estratexias e estudar liñas de acción coas que seguir intensificando a súa colaboración.
Algúns exemplos destas colaboracións son a participación de persoal de CONGALSA na Carreira pola Diversidade de Ámbar como voluntarios e participantes. Á súa vez, Ámbar implícase na Andaina Solidaria de CONGALSA, con ampla participación encabezada pola súa presidenta, Milagros Rey.
Ademais, a empresa con sede principal na Pobra patrocina o equipo de deporte adaptado da asociación e colaborou na adquisición de embarcacións de vela adaptada para a entidade, activou un programa de voluntariado corporativo, mediante o cal voluntarios de CONGALSA imparten obradoiros de horticultura nas instalacións da asociación e impartiu diferentes charlas de formación
en Ámbar centradas en ofrecer ferramentas para favorecer a empregabilidade de persoas con diversidade funcional. Xunto a isto, usuarios e membros do equipo directivo de Ámbar tamén participaron en talleres de sensibilización e concienciación ambiental organizados pola empresa especializada en alimentación.
