A portavoz nacional, Ana Pontón, participou en Noia na manifestación contra o vertido de catro millóns m³ de augas residuais da mina de San Finx autorizado polo Goberno do PP, que pon en risco un dos ecosistemas máis ricos de Galiza e o futuro de 5.000 postos de traballo directos no marisqueo e na pesca de baixura na Ría de Muros-Noia.
Pontón demandou ao Goberno de Rueda que rectifique a autorización dun vertido que é unha bomba ambiental de consecuencias desastrosas para toda unha comarca, pois o impacto afectaría á xente que vive do mar pero tamén a todos os sectores económicos da comarca que, directamente ou indirectamente, dependen da preservación do ecosistema da Ría Muros-Noia, como o sector da hostalería, restauración, comercio ou turismo.
O vertido asinado polo Executivo de Rueda permite á multinacional australiana propietaria da mina de San Finx verter en dúas fases un total de catro millóns de metros cúbicos de auga contaminada con metais pesados ao río Pesqueiras, que desemboca na Ría de Muros-Noia.
O BNG tamén demanda do Goberno da Xunta que tome medidas en relación ás dúas balsas de residuos mineiros colmatadas e en pésimo estado, que son un perigo ambiental que a empresa elude coa complicidade dun PP que non actúa. Un problema nesas balsas, como unha posible rotura dado o seu deterioro, tería consecuencias desastrosas sobre a Ría.
