Dúas delas foron rescatadas por unha embarcación particular e levadas ata o peirao, mentres que as outras conseguiron chegar a nado ata terra, ilesas.
Un particular que se atopaba na zona chamou ao 112 Galicia ás 12:20 horas, xa que observara como envorcou unha planadora que navegaba pegada á costa, entre as praias de Suigrexa e Cabeiro. Durante a conversa, indicaba que había polo menos unha persoa sobre o casco da embarcación, e varias na auga.
Desde o 112, informouse a Urxencias Sanitarias de Galicia-061, a Salvamento Marítimo, ao Servizo de Gardacostas de Galicia, á Garda Civil, á Policía Local e á Agrupación de Voluntarios de Protección Civil de Porto do Son.
Minutos despois, Salvamento Marítimo comunicaba que estaban a mobilizar un dos seus barcos de rescate.
Case ao mesmo tempo, un particular apuntaba que dúas das persoas accidentadas estaban a acadar o areal das Pitas, ilesas. Outra planadora conseguiu rescatar rapidamente aos dous tripulantes restantes e as levou cara o porto da localidade, onde chegou unha ambulancia para atender aos implicados en caso de que fose necesario.
