FEGADACE (Federación Galega de Dano Cerebral) e o Concello de Boiro colaboran na sensibilización e prevención do dano cerebral cunha charla. Será este luns 6 de marzo, no Centro Social da vila. A actividade forma parte do programa de divulgación da primeira das entidades, que ten os obxectivos de dar a coñecer a realidade das persoas con dano cerebral, pero tamén de axudar a previr esta discapacidade, que afecta a máis de 35.000 persoas en Galicia.
A sesión informativa está dirixida a todo tipo de público e nela a traballadora social de FEGADACE e unha educadora social da Asociación Sarela falarán da prevención das principais causas do dano cerebral (o ictus -que está detrás do 78% dos casos- e os accidentes de tráfico), e do modelo de atención e rehabilitación que se desenvolve nas asociacións galegas de dano cerebral, ditado polo Ministerio de Sanidade a través do IMSERSO. Centrarase especialmente en presentar o recurso asociativo máis próximo a Boiro: Sarela, a Asociación de Dano Cerebral de Compostela.
A charla vai ter lugar o luns 6 de marzo ás 11:00 horas no 1º andar do Centro Social (rúa Manuel María, 1) de Boiro.
A organización desta actividade conta coa colaboración do Concello de Boiro e co financiamento da Consellería de Política Social e Xuventude, dentro dos programas con cargo á asignación tributaria do 0,7% do IRPF; é dicir, grazas ás persoas que marcan a X Solidaria na súa declaración da renda.
FEGADACE constituíuse en 2007 polas cinco asociacións galegas de dano cerebral: ADACECO (A Coruña), ADACE en Lugo, Alento (Vigo), DCA Ourense e Sarela (Santiago). Xuntas representan algo máis de 2.000 familias. O seu obxectivo é contar cunha plataforma común de interlocución, coordinación e divulgación das necesidades do colectivo de persoas con dano cerebral adquirido, unha discapacidade que afecta a máis de 35.000 persoas en Galicia e que está causada case sempre por un ictus (78% dos casos) ou por un traumatismo cranioencefálico provocado por un accidente de tráfico.
