O grupo Boiro Novo emitiu un comunicado a conto da Piscina Municipal cuberta, que foi obxecto dunha reforma integral por parte do actual equipo de Goberno, a través do departamento de Deportes que dirixe Dores Torrado, que denunciara en 2018 “o estado deplorábel” no que se atopaban as ditas instalacións. No comunicado o grupo dá os parabéns ao Concello e especialmente á devandita área de Deportes, “polo remate dos traballos de mellora e pola apertura da Piscina Municipal, neste comezo do mes de marzo, mediante xestión directa dende o Concello, tal e como prometemos no noso programa”. No comunicado Boiro Novo tamén critica ao anterior equipo de Goberno (PP), ao que acusa de deixar a piscina convertida “nunha ruína”.
E engaden: “Nesta actuación o actual Executivo de Boiro estivo totalmente só. Houbo un convite a tódalas formacións políticas da Corporación menos ao PP, por ser o causante desta desfeita herdada, a botar unha man para sacar adiante este é outros proxectos necesarios para Boiro”. A agrupación sinala que os grupos “preferiron non dar o seu apoio, coa escusa repetida ata hai pouco, de que o convite chegaba tarde e non había tempo a executar as obras”. E engaden: “Certo é que nós tampouco tiñamos certeza de si habería tempo, pero puxémonos mans á obra e arrimamos o ombreiro. Tentámolo e conseguímolo”.
Boiro Novo remata o comunicado animando á veciñanza a que acuda a instalación e “que vexa a notábel mellora que se fixo neste tempo. Tamén aproveitan para anunciar que “dende este equipo de Goberno xa se está traballando nesa ampliación rexeitada pola oposición no seu día, para a que esperamos contar co apoio da veciñanza para acadala o antes posíbel”.
