A exposición itinerante Borranchos. Aproximación á obra de Valle-Inclán, do artista Domingo Regueira (Palmeira, 1945), remata a súa estancia en Santiago de Compostela, resultado da estreita colaboración existente entre o Museo Valle-Inclán da Pobra do Caramiñal e a Fundación Eugenio Granell. Esta actividade enmárcase na programación da vixésimo primeira edición das xornadas de homenaxe ao intelectual que se celebra na Pobra, dándolle unha proxección a estes actos máis aló de Arousa.
Os interesados aínda dispoñen ata o 1 de decembro para compartir a mirada do artista sobre as pasaxes literarias e personaxes valleinclanianos a través das 36 pezas, bosquexos ou borranchos realizados en augada e tinta. Neste senso, a mostra transita os espazos e os propios itinerarios do autor das Comedias Bárbaras. Con dúas instalacións previas na Pobra e Vilanova, invita ao espectador a trasladarse ao universo de ficción de Valle-Inclán.
