O actual rexedor boirense, José Ramón Romero, Martiño, presentou este venres á asemblea local do
PSdeG-PSOE de Boiro a súa proposta para seguir liderando a candidatura para gobernar nas eleccións municipais previstas para maio deste ano. A presentación pública como cabeza de lista terá lugar o vindeiro venres día 3 de marzo ás 20.00 horas no restaurante Chicolino de Boiro.
O obxectivo do actual rexedor de cara aos próximos comicios é consolidar o goberno para continuar co proxecto deseñado.
“Comezamos este proxecto en maio de 2019 cunha proposta a dez anos e queremos continuar nesta liña de progreso que precisa o noso concello”, recoñeceu Martiño.
“Estes anos no goberno supuxeron un cambio significativo para Boiro e os boirenses pero aínda queda moito traballo por facer para lograr ese Boiro do futuro”, afirmou o candidato. A agrupación valorou de xeito moi positivo o traballo do alcalde e o equipo de goberno durante estes catro anos ao fronte da alcaldía de Boiro.
O candidato contou co apoio da agrupación e máis adiante a Asemblea ratificará aos demais membros da lista que concorrerá ás eleccións municipais. “Estamos xa a traballar para conformar un equipo de traballo que reforce o existente e que nos axude a realizar un programa electoral para os vindeiros catro anos que atenda ás necesidades da veciñanza das distintas parroquias de Boiro”, asegurou Martiño.
