A Mancomunidade Barbanza Arousa presentou este mércores 18 xaneiro, no marco de FITUR 2023, un novo audiovisual que traslada aos espectadores ás vivencias que o destino ofrece aos seus visitantes. Trátase dunha peza en formato cinematográfico que escolma e compendia os atractivos dos catro concellos de Arousa Norte (A Pobra, Boiro, Rianxo e Ribeira) a través dunha das moitas historias que se poden vivir na comarca. O vídeo serve de complemento á guía presentada na anterior edición do FITUR por Barbanza Arousa, na que se recollían centos de propostas para gozar de Barbanza Arousa a través do deseño de experiencias e a súa posta a disposición do mercado a través de axencias de viaxes.
“Este ano”, informou a mancomunidade, “buscouse transmitir ao público unha historia a través da que vivir e descubrir Barbanza Arousa, mostrando pinceladas do que unha estadía no territorio pode achegar aos turistas que así queiran gozalo”. A campaña fai fincapé “no valor das empresas e actividades locais, fundamentais para o desfrute do visitante”. Así mesmo, engade a entidade supramunicipal, esta nova edición de FITUR serviu para comunicar a concesión dun Plan de Sustentabilidade Turística que baixo o título Viaxe a través dos sabores suporá “un impulso definitivo á promoción e comercialización do destino, definíndose como unha comarca turística na que a enogastronomía sexa o eixo central dos seus atractivos”.
A presentación iniciouse da man da xerente da Mancomunidade, Fátima Cachafeiro, que fixo fincapé “nas inmensas posibilidades que ofrece o territorio ao longo dos 365 días do ano”.
A continuación, proxectouse o audiovisual, cualificado de “innovador” polo seu carácter cinematográfico, que espertou o interese absoluto do público asistente.
O acto continuou coa intervención de José Ramón Romero, presidente da Mancomunidade, e de Antonio Leira, deputado provincial da Coruña, que destacou a importancia de conseguir a implicación do tecido empresarial na estratexia turística.
A continuación, realizou a súa intervención Gonzalo Trenor, delegado territorial da Xunta de Galicia na provincia da Coruña, na que remarcou que o territorio posúe “unha oferta rica, variada e integrada, adaptada ás esixencias do turista”.
O acto foi pechado por Nava Castro, directora de Turismo de Galicia, que coas súas palabras quixo remarcar que o plan de sustentabilidade de Barbanza Arousa foi “un exemplo para imitar, sendo o mellor valorado e presentado desta última convocatoria”.
A participación da Mancomunidade Barbanza Arousa en FITUR 2023 continuou cunha importante axenda de reunións con operadores turísticos, seguindo coa estratexia xa iniciada o pasado ano coa venda de experiencias e paquetes turísticos en territorio nacional e en Portugal. Así mesmo, a mancomunidade salientou que o foro, referente estatal e internacional do eido turístico, “permitiu o establecemento de sinerxías con outras entidades públicas a través de proxectos de alto valor engadido e potenciación conxunta das marcas individuais de cada un”.
