Os colectores de roupa instalados no municipio de Boiro mediante unha colaboración entre o Concello e Cáritas Diocesana recolleron no pasado ano un total de 31.811 quilogramos de residuo téxtil. No termo municipal hai instalados cinco colectores de residuo téxtil.
En marzo de 2020 o Concello de Boiro e Cáritas Diocesana de Santiago de Compostela asinaron un convenio de colaboración para a colocación de colectores de roupa coa finalidade de realizar a recollida e tratamento do residuo téxtil. Na actualidade hai instalados cinco colectores, dous na praza da Mancomunidade, un na igrexa de Santa Baia, un en Cabo de Cruz e outro en Escarabote, así como o roupeiro parroquial de Boiro.
Segundo informaron Concello e Cáritas no seu balance anual, todo o material recollido nos colectores é levado á nave que Arroupa ten no Polígono do Tambre para rexistrar todos os residuos recollidos e posteriormente clasificalos segundo o seu destino final. “Estes contedores non só contribúen a un labor social, senón que son o inicio dunha nova recollida para todo o municipio”, afirmou o concelleiro de Servizo Sociais, Raúl Treus.
A finais de 2023 todos os concellos galegos deberán ter implantada, en todos os núcleos de poboación, unha recollida específica de téxtil. Con esta proposta contribúese a fomentar a correcta recollida destes residuos e garántese o seu tratamento adecuado.
