A Consellería de Infraestruturas e Mobilidade, a través de Augas de Galicia, vén de adxudicar por máis de 940.000 euros as obras de ampliación da rede de saneamento municipal do concello de Padrón.
Os traballos, adxudicados á empresa Proyecon Galicia S.A, contarán cun prazo de execución de 6 meses.
Trátase da execución das obras dunha rede de colectores e catro estacións de bombeo de augas residuais nos núcleos de Herbón, Lestido, A Aduana e O Paraíso.
Esta intervención enmárcase no convenio asinado entre a Xunta e o Concello, na liña de colaboración que vén desenvolvendo o Goberno galego de apoio ao desenvolvemento das competencias municipais en materia de auga.
A Xunta asume o cofinanciamento das actuacións nun 80% e levará a cabo a contratación, dirección e execución das obras.
Pola súa banda, o Concello de Padrón asume o 20% do financiamento restante das obras, a realización das xestións pertinentes para posibilitar a súa execución, así como a recepción, mantemento e conservación das actuacións que se leven a cabo.
As actuacións serán financiadas pola Unión Europea no marco do eixe REACT UE do programa operativo Feder Galicia 2014-2020, como parte da resposta da Unión á pandemia da covid-19.
Características técnicas
As obras de ampliación da rede de saneamento executaranse de modo que se conecten á rede xeral para, posteriormente, ser conducidas ata a estación depuradora de Padrón as augas residuais xeradas en Herbón, así como nos núcleos do Barco, Lestido, O Piñeiro, Vista Alegre, A Aduana, O Pombal, O Muelle e O Paraíso, da parroquia de Iria Flavia.
A intervención centrarase na ampliación da rede de saneamento mediante unha serie de colectores por gravidade executados en tubaxe de PVC. Ademais, prevense 4 estacións de bombeo nos puntos baixos: nos núcleos de Herbón, Lestido, A Aduana e O Paraíso. As impulsións proxéctanse en polietileno de 90 mm de diámetro.
Coa rede proxectada por Augas de Galicia darase servizo a unha poboación de 669 habitantes para o ano horizonte 2044.
