A parroquia de Nebra (Porto do Son) vai acoller este domingo 18 de decembro o seu tradicional Festival de Panxoliñas, unha das grandes citas culturais e festivas de cada Nadal na nosa comarca, moi envorcada en recuperar a rica tradición musical galega relacionada con estas datas sinaladas que se aveciñan. Será como dixemos este domingo na Igrexa de Nebra a partir das 17.30 horas. A axenda inclúe a participación de diferentes agrupacións da nosa comarca.
Ao remate do festival está prevista unha celebración veciñal de tipo gastronómico, con chocolatada e rosca no local da Comunidade de Montes de Nebra (cortesía do Concello de Porto do Son). Quen queira ir mergullándose no programa do festival, lembrar que a rede social Youtube dá acollida a unha manchea de vídeos das diferentes edicións do evento, da man de Paco do Martelo ou Toño Calo.
