Dúas persoas foron evacuadas ao centro médico despois de sufrir unha saída de vía en Esteiro, no concello de Boiro.
Foi unha testemuña do accidente quen chamou ao 112 ao fío das 00:30 horas para informar dun vehículo que se precipitara ao mar nas proximidades dunha depuradora en Cabo de Cruz, na parroquia do Castro. Malia que o turismo rematou parcialmente somerxido, os dous ocupantes foron quen de saír polos seus propios medios. Aínda así, semellaban necesitar asistencia sanitaria.
Para prestar axuda aos implicados e xestionar a retirada do vehículo, desde o 112 informouse aos profesionais de Urxencias Sanitarias de Galicia-061, aos Bombeiros de Boiro, aos axentes da Garda Civil e aos efectivos de Protección Civil da localidade. Ademais, informouse á Policía Local, ao Servizo de Gardacostas e ao persoal de Portos de Galicia.
Finalmente, un dos afectados foi trasladado en ambulancia polo equipo médico mentres que o outro foi evacuado por familiares.
