O Concello de Outes está a preparar os detalles para un acto de homenaxe a Chema Fuentes Fernández, con motivo do 50 cabodano do seu pasamento. Será este sábado 3 de decembro, ás 12.00 horas no Parque da Cruz, na Serra.
Chema Fuentes Fernández, tal e como recordou O Barbanza na súa máis recente edición en papel (na páxina 22, nunha reportaxe a toda páxina), foi un rapaz de Outes estudante de Medicina que en 1972, durante a última etapa da ditadura franquista, morreu asasinado en Santiago polo policía Luís Miguel Quiroga Mouzo, na rúa doutor Teijeiro, logo de telo parado un coche patrulla e mentres lle realizaban a identificación. A morte de José María Fuentes Fernández, Chema, fillo do coñecido doutor don Fernando Fuentes, provocou unha auténtica revolta en Santiago, sobre todo porque veu acompañada dunha versión errónea dos feitos que tentaba exculpar ao policía.
Ao día seguinte do seu asasinato, os alumnos celebraron asembleas nas que se tomou a decisión de non asistir a clases e manifestarse pola cidade, a USC viuse obrigada a pechar as súas portas, houbo lanzamentos de cócteis molotov, un deles na Facultade de Ciencias que permanecía aberta, e noutros puntos da cidade; fixéronse barricadas con materiais de obras e cortáronse as rúas.
O Goberno Civil tivo que modificar a súa versión oficial e recoñecer que se produciu un claro abuso policial e o xulgado ordenou a detención inmediata do axente responsábel da morte. Compostela era un fervedoiro que se trasladou a Outes cando miles de universitarios (máis de tres mil sinalaban as crónicas) déronse cita na localidade para o enterro de Chema. As flores esgotáronse en toda a comarca e centenares de caraveis vermellos depositáronse sobre a tumba no medio dunha impresionante manifestación de duelo.
