A asociación comarcal Amicos clausurou este venres 18 de novembro, na sala de plenos do Consistorio de Caldas de Reis, o seu curso de operario/a de almacén, pertencente ao seu programa Máis Emprego que desenvolve a entidade en colaboración coa Fundación La Caixa e o Fondo Social Europeo.
Os doce alumnos participantes recibiron un diploma recoñecendo o seu esforzo no curso.
A formación, dirixida a persoas desempregadas con discapacidade ou en risco de exclusión social, tivo unha duración de 40 horas presenciais.
Jesús Martínez, da empresa Ara Formación, foi o encargado de impartir a ensinanza, a cal permite achegar aos participantes ao mercado laboral.
Ao acto acudiu o alcalde de Caldas de Reis, José Manuel Rey, quen afirmou que “foi un pracer ceder este espazo para contribuír á formación dos que máis o precisan” e “que dende o Concello estamos á vosa disposición para o que necesitedes”.
Doutra banda, Miguel Beiro, responsábel da área de Alianzas e Emprego de Amicos quixo dar as grazas a todas as persoas participantes, recoñecendo o esforzo realizado e animándoas a ter unha boa actitude de cara ao mundo laboral.
Unhas emotivas palabras do presidente de Emdesfor pecharon o acto: “A actitude é o que vale no traballo e na vida. É todo. As limitacións témolas todos, pero sempre hai que manter o ánimo.”
Entre os asistentes atopábanse Marta Besada e Rosa Agrelo, dúas técnicas da asociación Amicos
neste programa que quixeron agradecer aos participantes o interese e tenacidade ao longo de todo o curso. Asemade, dedicaron unha palabras de agradecemento ao Concello de Caldas pola súa boa predisposición cedendo o espazo no que realizar a formación e permitindo que accións como esta sexan posíbeis.
