Este domingo cómprense 20 anos desde aquel 13 de novembro de 2002 no que o Prestige ficaba á deriva a poucas millas das costas galegas.
A desgraza derivada do seu afundimento e das toneladas de chapapote que inundaron o litoral do país causou un forte impacto na sociedade galega, derivando na histórica mobilización do colectivo Nunca Máis.
Unha resposta social que ten como símbolo en Noia o mural realizado por integrantes do BNG naqueles meses de efervescencia na sociedade galega, e que agora foi recuperado pola formación nacionalista xusto na fin de semana na que se cumpren dúas décadas da catástrofe.
O histórico mural atópase na beira da ría de Muros e Noia, no municipio noiés, e tiña unha situación de degradación derivada do paso dos anos. Semanas atrás eliminouse a vexetación que impedía a súa visibilidade e o mural recuperou o seu sitio privilexiado no porto de Compostela.
Este sábado, véspera do aniversario do accidente do petroleiro, integrantes do BNG da comarca de Muros e Noia achegáronse ás inmediacións da histórica pintada coa intención de que permaneza “visible e esplendorosa para a lembranza do acontecido no ano 2002”.
Os nacionalistas da comarca lembran que “desta desgraza emerxeu un movemento de dignidade sen precedentes” como foi Nunca Máis, e que polo tanto “é necesario render homenaxe a un episodio histórico para o país como aquel, así como non permitir o esquecemento do acontecido”.
Por ese motivo, o BNG de Muros e Noia tomou a iniciativa para a recuperación do emblemático mural escollendo unha data tan sinalada, na que a desgraza volve a estar presente na conciencia do pobo galego.
A forza nacionalista considera ademais, que “é necesario que a memoria perdure no tempo”. “O histórico mural na ría é unha forma perfecta de non esquecernos do acontecido”, afirman. Por iso, sinalan que asegurarán o seu posterior coidado “para que sirva de símbolo e lembranza no futuro.
