Este xoves 14 de novembro temos unha cita, no Centro Cultural Lustres Rivas de Ribeira, con todos aqueles escritores en lingua hispana que acadaron o que, por prestixio e contía económica, é para unha boa porcentaxe de seareiros e seareiras da lectura o galardón literario máis relevante: o Premio Nobel. Estamos a falar da conferencia programada a partir das 20.00 horas co profesor de Lingua e Literatura Española, Xabier López Marqués: un relatorio que xirará arredor dos grandes autores que recibiron a dita distinción da academia sueca.
O acto tamén servirá de clausura da exposición bibliográfica homónima que está presente na Biblioteca Municipal desde o 1 de outubro (co gallo do trixésimo aniversario do galardón obtido polo galego Camilo José Cela). A mostra exhibe obras dos once galardoados en lingua castelá: José Echegaray, Jacinto Benavente, Juan Ramón Jiménez, Vicente Aleixandre, Camilo José Cela, Gabriela Mistral, Miguel Ángel Asturias, Pablo Neruda, Gabriel García Márquez, Octavio Paz e Mario Vargas Llosa, así como carteis conmemorativos con textos de cada un dos devanditos escritores.
