Unha embarcación de Salvamento Marítimo trasladou ao operario ata Aguiño, desde onde foi evacuado en ambulancia ao hospital.
Un particular alertou ao 112 Galicia, ás 11:15 horas, de que un traballador sufrira un golpe na cabeza cando realizaba tarefas de descarga nun buque situado no peirao da illa de Sálvora. Segundo informaron os servizos de emerxencias, o ferido golpeouse cun cabo en mal estado que se soltou.
Entón, desde o 112 solicitouse a colaboración no operativo de Urxencias Sanitarias de Galicia-061, de Salvamento Marítimo, do Servizo de Gardacostas de Galicia e da Policía Nacional.
Os efectivos de Salvamento Marítimo encargáronse de levar ao ferido á costa de Aguiño, onde o recolleu unha ambulancia na que foi trasladado ata o Hospital do Barbanza.
