A Deputación da Coruña vén de comunicar que concede ao Concello de Ribeira 11 prazas para participar na Campaña de Inverno 2020, a cal se desenvolverá na estación invernal de Cabeza de Manzaneda, sendo a primeira quenda desde o 24 ao 27 de xaneiro de 2020.
Esta iniciativa está destinada a rapazada con idades comprendidas entre os 11 e 15 anos inclusive (cumpridos a 31 de decembro de 2020). Ademais, a campaña inclúe transporte, estadía e manutención no citado lugar, monitores, clases de esquí, seguros, alugamento de material, remontes mecánicos e todo o gasto que ocasionen as actividades e cursos programados.
O prezo establécese nos 85 euros e as persoas interesadas en participar deberán entregar un formulario debidamente cuberto xunto coa documentación requirida, entre o 12 de novembro e o 4 de decembro de 2019, no Rexistro Xeral do Concello de Ribeira.
Unha vez rematado o prazo, se houbese máis solicitudes que prazas, realizarase un sorteo no cal terán preferencia aquelas persoas que non participasen anteriormente na campaña.
