O Concello de Boiro, a través do Centro de Información á Muller (CIM) de Boiro, organiza un programa de actividades centrado en fomentar hábitos saudábeis entre a poboación feminina. O programa Mulleres e Saúde foi debullado nos seus detalles pola concelleira de Igualdade, Dores Torrado, quen salientou este mércores 26 que as accións previstas (obradoiros e faladoiros) “poñen o foco na saúde das mulleres mediante formación en temáticas moi actuais ás que moitas veces é complicado chegar”.
O programa inclúe un faladoiro sobre A saúde das mulleres na menopausia que se vai desenvolver o mércores 9 de novembro de 17.00 a 20.00 horas, e que será impartido por Iria Cierto Buján, matrona da Escala Galega de Saúde para Cidadáns. Ademais esta actividade inclúe un servizo de ludoteca para facilitar a conciliación.
O mércores 23 de novembro haberá tamén un faladoiro sobre Endometriose, a epidemia oculta, que se desenvolverá de 17.00 a 19.00 horas e será impartido por Verónica Ramilo Graña, sexóloga da Asociación QuerENDO, Mulleres con endometriose e que contará tamén con servizo de ludoteca.
O programa inclúe uns obradoiros sobre saúde sexual para mulleres adultas nomeados Encantada de coñecerme que serán os sábado 12 e 19 de novembro de 11.00 a 13.00 horas, facilitados por Jeane Costa, sexóloga de SEDRA – Federación de Planificación Familiar.
O sábado 26 de novembro haberá tamén unha xornada sobre Menstruación sostible en horario de 11.00 a 13.00 horas e que organiza o Foro Ecolóxico de Boiro.
Todas as actividades vanse desenvolver no Centro Social de Boiro e serán de balde. Toda a información sobre o programa e inscricións no CIM de Boiro a través do enderezo electrónico cim@boiro.org ou no teléfono 981 377 559.
Entre as actividades e servizos do programa Mulleres e Saúde vaise desenvolver tamén un asesoramento sexolóxico, un servizo individualizado, confidencial e anónimo que realiza SEDRA – Federación de Planificación Familiar. Máis información deste servizo no 698 126 048 ou no enderezo electrónico galicia@sedra-fpfe.org.
