A parroquia ribeirense de Aguiño acollerá a undécima edición da Mostra de Teatro Afeccionado Francisco Lorenzo Mariño do 9 ao 30 de novembro. Nesta ocasión, compañías procedentes de Narón, Melide, Pedrouso e Cuntis serán as encargadas de achegar esta rama das artes escénicas a través das súas diversas obras.
Esta cita tamén conta cun fin solidario porque este ano, seguindo o curso de edicións pasadas, recadaranse fondos a favor da Asociación TDAH Comarca do Salnés, na súa delegación de Barbanza e con sede na Casa da Cultura da localidade.
O Aturuxo de Melpómene levará a escena Algo pasa con Paco o sábado 9; Charamela con Pode ser calquera… o sábado 16; Sociedade Cultural e Recreativa A Pombiña con Defectos de fábrica o sábado 23; e Chumpá Teatro con Intocables. A comedia o sábado 30. Ademais, tódolos espectáculos se celebrarán ás 20.30 horas no Conservatorio-Aula de Música de Aguiño, sendo a entrada de balde ata completar aforo.
Desde a organización animan á veciñanza a asistir, a cal “constitúen xa un público fiel deste evento e agardan por esta celebración que dende o seu comezo en 2009 se ven celebrando nos sábados de novembro.”
Esta mostra conta coa colaboración da Concellería de Cultura de Ribeira e a Deputación da Coruña, así como diversas empresas e entidades.
