O Concello de Boiro, a través do departamento de Servizos Sociais, vén de adquirir catro novas grúas para adxudicar a familias usuarias do Servizo de Axuda no Fogar (SAF) con persoas dependentes ao seu cargo. Estas guindastres permiten a mobilidade de persoas dependentes e xa foron entregadas ás persoas usuarias que as tiñan solicitadas.
Os aparellos adquiríronse mediante o POS+ 1/2022 de Servizos Sociais Extraordinarios da Deputación da Coruña para sumar ás que xa dispoñía o Concello de Boiro, que informou que as grúas permiten recoller a persoas do chan co arnés para depositalas na cama ou tamén para transferencias de espazos, cun rango de elevación de ata 1,74 metros e unha rotación de 360º.
Cada grúa ten un custe de entre 900 e 1000 euros, polo que son moitas as persoas que demandan este servizo ao Concello. “Con esta nova adquisición de grúas cubrimos as necesidades da demanda, pero é preciso seguir aumentando o número destas axudas técnicas para dar servizo á veciñanza”, comentou o edil de Servizos Sociais, Raúl Treus.
O Concello de Boiro dispón de colchóns anitescaras para persoas acamadas, de camas articuladas e grúas para persoas con servizo SAF e familias con persoas dependentes ao seu cargo que precisan algún destes servizos.
