A Deputación da Coruña, a través da área de Normalización Lingüística, vai celebrar en clave dixital e multitudinaria os 200 anos do nacemento de Antolín Faraldo (o 2 de setembro de 1822 en Betanzos). Farao nas redes sociais cun concurso xornalístico e cun slam poético. Estas actividades forman parte da programación do Ano Faraldo, que organizan a Deputación e o proxecto Pesquedellas, artífices destes Xogos Florais.
Concurso poético
Dotado con 150 euros para o gañador e con 100 euros para o seguindo mellor traballo, trátase dun certame de xornalismo dirixido a mozas e mozos de entre 16 e 35 anos. O prazo de presentación remata o 15 de agosto. Os e as participantes teñen que escribir un texto orixinal en galego, con temática cultural libre e cunha extensión máxima de 500 palabras. Os artigos gañadores serán publicados no suplemento cultural Antolín Faraldo do mes de setembro, que distribúe a Asociación de Comerciantes e Empresarios de Betanzos.
Slam poético
É un concurso no que cada participante, non maior de 35 anos, recitará en directo poemas da súa creación, de temática libre, pero empregando obrigatoriamente a lingua galega. O xurado escollerase entre o público asistente. Todos os poemas deberán usar unha estrofa que siga a métrica das coplas de tradición oral galegas. Outorgaranse tres premios de entre 150 e 100 euros. As persoas que queiran recitar teñen que enviar un correo ao enderezo pesquedellas@gmail.com ou deixar unha mensaxe nas contas de Instagram ou de Facebook o proxecto Pesquedellas (@proxectopesquedellas).
Chamamento á participación
A deputada de normalización lingüística, María Muíño, fai unha chamada á xente moza para se anime a participar nas actividades que se van desenvolver na vila de Betanzos, lugar de nacemento do homenaxeado, en especial nestes dous concursos dirixidos de xeito específico para eles e elas. As bases completas pódense consultar e descargar en liña.
