A Xunta dotou de iluminación a Ponte Nafonso, que une os concellos de Noia e Outes na estrada AC-196, “contribuíndo á súa posta en valor e ao reforzo da seguridade de vehículos e de peóns”. O Goberno galego explicou que a iluminación escollida (en base a un modelo de baliza encaixada no peitoril, sistema tamén usado na Ponte Sampaio, en Pontevedra), vai dirixida a “realzar a monumentalidade da infraestrutura”.
Esta actuación forma parte dos traballos de rehabilitación impulsados pola Xunta, cun investimento autonómico de máis de 700.000 euros, que están xa na súa fase final, “só pendentes de remates”. Estes labores retomáronse en abril, tras recibir o visto bo da Comisión de Patrimonio da Coruña o novo proxecto para a ponte, que recollía a configuración do peitoril de pedra en lugar do metálico, e unha vez superado o paro do transporte que adiou o seu reinicio.
O proxecto inicial propoñía a instalación dunha varanda metálica, cuxo deseño estaba previsto para a contención de vehículos cunha velocidade de 50 km/h. “Porén”, recordaron fontes da Xunta,”a limitación a 20 ou 30 km/h nas vías que dispoñan plataforma única de calzada e beirarrúa, fixo necesario optar finalmente por colocar un peitoril de pedra”. O obxectivo foi “conxugar a funcionalidade da infraestrutura co máximo coidado e a súa posta en valor, dada a súa singularidade ao tratarse dunha ponte medieval”.
A obra tamén incluíu a substitución do pavimento e da varanda, así como a limpeza dos paramentos exteriores co fin de “mellorar o seu aspecto estético e mantela en bo estado de conservación”.
