A Asociación Cultural A Carballeira da Baña organiza as Festas do Araño do 5 ao 7 de agosto. Comezarán o venres 5 cunha sesión vermú a cargo dos Gaiteiros de Buxaina e logo pola noite haberá verbena, a partir das 22.30 horas, co Dúo Carpe Diem e a Orquestra Capitol.
Ao día seguinte prosegue a troula ao mediodía coa Banda de Gaitas Buxaina. Pola tarde haberá partido no Pouso, no que se enfrontan o Araño e o Buía, ás 18.00 horas, e pola noite volve a verbena co Dúo Charada e a Orquesta Furia Joven de Canarias, ás 22.30 horas. O domingo comeza cunha ruada da Banda de Gaitas Buxaina e cunha nova sesión vermú, desta volta a cargo da Banda da Escola de Música de Rianxo. Pola tarde, a partir das 18.00 horas, haberá inchábeis para os máis pequenos, e pola noite verbena (IV Sons da Carballeira, a partir das 21.30 no Campo da Carballeira) con Faíscas de Pontraga e A Requinta da Laxeira.
