A Consellería de Política Social que dirixe a ribeirense Fabiola García vén de ampliar as prazas de atención no Centro de Día público autonómico da Pobra do Caramiñal. En total, co incremento da dispoñibilidade chégase á cifra de 30 prazas.
A conselleira de Política Social e Xuventude, Fabiola García, visitou este martes 5 de xullo as instalacións onde sinalou que con esta ampliación “increméntase a capacidade de atención deste centro que leva seis anos ofrecendo coidados, agarimo e atencións aos veciños da comarca do Barbanza”.
En concreto, poranse en marcha dez novas prazas que se suman ás 20 que xa estaban en funcionamento. Deste xeito, o investimento anual nestas instalacións ascenderá ata os 272.000 euros. Fabiola García puxo en valor “o traballo dos profesionais deste centro de día para mellorar a calidade de vida das persoas maiores da zona con terapias, actividades para unha vida activa e atención”.
