Os nenos e nenas dos seis centros de ensino de infantil e primaria do municipio foron os encargados este venres de dar o inicio ás Festas do Verán No acto, conducido polo monologuista Brais Doval, participaron o alcalde, José Ramón Romero, e a concelleira de Cultura e Educación, María Outeiral.
Un total de 14 nenos e nenas foron os encargados de facer a lectura do pregón que versou sobre o que para eles significan as festas de Boiro. Despois de dous anos de restricións, as Festas do Verán 2022 recuperan o seu esplendor cun programa repleto de actividades para todos os públicos e que poñen o foco nos nenos e nenas. “Quixemos que eles foran os pregoeiros porque neste tempo de pandemia déronnos un exemplo de responsabilidade e merecen ser os grandes protagonistas das nosas festas”, afirmou a concelleira María Outeiral durante a súa intervención.
Ana Stasenko do CEIP Praia Xardín; Noa Vidal, Aitor Gómez, Rubén Martínez do CEIP Santa Baia; Alonso Cardama do CEIP Escarabote; Lara García Saborido e Gabriel Suárez do CEIP Santa María do Castro; Ainara Maneiro, Diego Lijó e Daniela López de CEIP Cespón; Sarai González e Sara Tubío do CEIP Abanqueiro; Antía Viturro e Martina do CEIP Pazos- Comoxo.
Na súa intervención falaron dos seus recordos das festas do verán, de xuntarse cos amigos e a familia e que este ano, ademais do inicio do verán marcan tamén “a volta á tan ansiada normalidade”.
O alcalde de Boiro, José Ramón Romero, foi o encargado de pechar o acto e na súa intervención agradeceu o traballo realizado polo departamento de Cultura para sacar adiante estas festas “que están pensadas para que todos e todas disfrutemos delas” e tamén pediu responsabilidade nestes días que son
“para disfrutar, reencontrarse coa familia e cos amigos”.
O programa de actividades continúa este sábado coa alborada a cargo dos Caraveiros a partir das 10.00 horas; ás 11.00 hors festa tradicional no parque da Cachada con Os Monifates, Xilbarbeira, Abeloura, Aroña, Baile de Abanqueiro e o grupo de gaitas Os Salgueiriños. Ás 13.00 horas xantar popular
coa festa da orella da Boliña e pola tarde na Praza de Galicia orquestra Metrópolis e Café Quijano e na praza da Terceira Idade Terbutalina.
