O Colexio Oficial de Arquitectos de Galicia comunicou a plena interoperabilidade entre os procedementos de tramitación da entidade profesional de Concello de Ribeira (tramitación de traballos profesionais no caso do COAG, e de licenzas e outras autorizacións urbanísticas no caso da Administración local). Este proceso de simplificación administrativa e de concordancia entre as dúas entidades foi posíbel grazas ao convenio asinado entre o COAG e o Concello.
Segundo informan fontes do Consistorio ribeirense, o acordo (que fora presentado polo alcalde Manuel Ruiz, a naquel entón concelleira de Innovación Tecnolóxica Ana Barreiro, e Ángel Cid como representante do COAG en Santiago) “suporá unha maior simplicidade na realización de trámites burocráticos entre os cidadáns, ademais de repercutir noutros beneficios como aforro en papel e menos custes”.
Así, engade o Concello, “a partir de agora non será necesario presentar a documentación técnica requirida no Rexistro ou o Portelo Dixital do Concello, senón que basta con consignar o código de expediente/traballo do COAG na tramitación da licenza ou doutras autorizacións administrativas, de forma que o Concello poida acceder á documentación técnica correspondente para incorporala á tramitación municipal”.
Como requisito, os arquitectos redactores deberán autorizar a descarga e proporcionar ao promotor que solicita a licenza ou outras autorizacións, o código de expediente e traballo, para que se indique na solicitude. A partir dese momento, o Concello poderá descargar a documentación técnica desde o COAG para que quede incorporada ao expediente municipal, sendo notificados os arquitectos autores no momento no que esta descarga se producen.
O Concello de Ribeira tamén puxo o foco “no importante esforzo que está a despregar a Administración local na adopción de medidas que contribúan a un menor gasto de papel (e a unha menor pegada no medio ambiente) e a axilizar os trámites burocráticos”.
