O Concello de Dodro informou a semana pasada do inicio dos traballos para limpar e acondicionar a ponte do Portancho, en Traxeito, labores de posta en valor que están a ser realizados pola Deputación da Coruña e que inclúen a roza do perímetro e un estudo previo por parte da empresa de arqueoloxía que se vai encargar dos traballos.
O Concello lembrou tamén que este proxecto responde a unha solicitude feita dende o Consistorio e transmitida ao departamento de Vías e Obras da Deputación da Coruña. No requirimento poñíase o foco no estado actual da ponte, cuxa estrutura de arco non era apreciábel debido á vexetación que a recubría.
