O Concello de Boiro, a través da área de Igualdade, celebra este mes o Día Internacional do Orgullo LGTBI (28 de xuño) cunha serie de actividades. A primeira das propostas será unha charla co youtuber OlaXonMario (natural de Boiro e seleccionado como mellor creador na edición V dos Premios Youtubeiras pola súa canle de contidos), o vindeiro martes día 7 de xuño para o alumnado dos centros educativos locais.
Este faladoiro, que terá lugar na Casa da Cultura de Boiro, vai abordar diferentes expresións de sexo-xénero e culturas que non seguen esquemas home-muller, relación monogámicas e as que prohiben prácticas homosexuais.
Esta actividade forma parte da programación financiada polo Pacto de Estado e completa a outras propostas que se desenvolveron durante todo o ano para a prevención e sensibilización ante calquera forma de violencia de xénero.
O Concello de Boiro a través da Concellería de Igualdade levou a cabo obradoiros de independencia dixital para mulleres, obradoiros STEAM (acrónimo de Ciencia, Tecnoloxía, Enxeñaría, Arte e Matemática), obradoiros afectivosexuais nos centros de ensino, etc.
