O Concello de Boiro vén de solicitar á Consellería do Mar información sobre os pasos realizados para poñer solución a problemática do sector mexilloeiro, unha problemática que segundo explican fontes do Executivo boirense “non está a te resposta por parte da Xunta”, de aí que os representantes do dito sector se puxeran en contacto co Goberno local na procura de “arranxar a situación que están a sufrir”.
O Concello tamén lembra que no mes de decembro o pleno da Corporación boirense aprobou por unanimidade a derrogación inmediata o artigo 13.2 polo que se regula o réxime de conservación e explotación dos recursos marisqueiros e algas; a renuncia a aprobación de plans do percebe que impoñan cambios no marco legal existente para a recollida de mexilla; e o compromiso de que os cambios futuros se debatan no seo do Consello do Mexillón.
O Concello engade que o sector mexilloeiro é “un sector fundamental para a economía do municipio” que “nestes intres está a ver limitadas as condicións para o desenvolvemento idóneo do seu traballo”.
A respecto do devandito, o Consistorio quere trasladar á Xunta “que os bateeiros recoñecen que por parte da Consellería se comprometeron con eles en estudar as zonas do litoral con cría e sen percebes para poder desenvolver o seu traballo pero que a situación segue sen estar solucionada”.
O Goberno local tamén pon o foco na preocupación do sector sobre a situación na que se atopan, “xa que hai zonas do litoral que teñen cría e non percebe que seguen pechadas sen motivo algún e non reciben ningún tipo de resposta por parte da Administración autonómica”.
O Concello recorda que os bateeiros piden unicamente “que se revise o litoral” e que “se achegue información dos pasos que se realizaron nos últimos meses para poñer solución a esta problemática que afecta gravemente ao traballo dun dos sectores máis importantes para a economía boirense como é o sector mexilloeiro”, engaden dende o Consistorio.
