O Concello de Boiro, a través do servizo de electricidade, traballa para a mellora da iluminación en todos os núcleos de poboación do rural. Nos últimos meses realizouse un importante traballo de renovación de luminarias e de aumento de puntos de luz nos lugares máis sensibles pola falta de iluminación.
Son numerosas as demandas que a diario se reciben no Concello para a mellora da iluminación a través do servizo de incidencias. Co obxectivo de mellorar a iluminación e incidir no aforro enerxético, cada vez que se funde unha luminaria cambiase por unha nova tipo led. Estase a traballar tamén por mellorar a iluminación co aumento de puntos de luz nas zonas máis sensibles como poden ser as zonas escolares ou paradas de autobús.
Ademais da reparación de incidencias, nas últimas semanas realizouse unha renovación integral da iluminación en diversos puntos do rural. Actuouse nas aldeas de Mieites, Comba e San Martiño co cambio da luminarias a led e ampliación de puntos de luz. Tamén se fixo a renovación de luminarias nos
cemiterios de Cespón e Abanqueiro, na contorna e vías de acceso ao Náutico de Barraña e en diversos puntos do núcleo urbano como é o tramo final da rúa Pablo Iglesias.
Máis da metade das incidencias notificadas correspóndense con alumeado público polo que o Concello de Boiro reforzou o servizo co obxectivo de axilizar a resolución destas incidencias. Mediante o servizo de xestión de incidencias Liña Verde notificáronse nos primeiros dous meses do 2022 un total de 264 incidencias relacionadas co alumeado, o que supón un 50,67% do total das rexistradas das cales hai un porcentaxe de resolución dun 75%.
