M. A.- O Pavillón da Cachada será escenario este sábado ás 20.00 horas da estrea do Rotogal Boiro Voleibol nunhas eliminatorias polo título da Superliga. Os boirenses, que pecharon a primeira fase na sétima posición, reciben ao Unicaja Almería, que concluíu segundo e foi o seu verdugo na Copa do Rei, hai exactamente un mes, por un axustado 3-2.
Con eses alicientes, os de Marcelo Benavídez tentarán dar un golpe enriba da mesa e sumar unha vitoria que colocaría contra as cordas aos andaluces no cruzamento que se resolve ao mellor de tres partidos.
En principio, o Rotogal Boiro Voleibol contará con todos os seus efectivos para recibir ao Unicaja Almería. Os da Cachada tratarán de minimizar os erros e explotar ao máximo as súas virtudes para
apurar as opcións de éxito ante un dos firmes candidatos a facerse co título da Superliga.
O técnico Marcelo Benavídez recoñece que os andaluces son “un gran equipo, con grandes
xogadores”, pero advirte que os seus chegan á cita “coa confianza a tope”.
O Unicaja Almería conta co oposto Pavel Kukartsev, MVP da tempada 2020-2021, como
referente ofensivo. Pero dispón doutros xogadores, como o receptor Javier Jiménez Scull ou o central
internacional Miguel Ángel Fornés, que resultaron fundamentais para bater ao Rotogal Boiro Voleibol en cuartos de final da Copa do Rei.
Os colocadores Portero e Jovanovic ou o receptor Juanma González Limón son outros dos homes importantes do conxunto que dirixe Manuel Berenguel.
O resto das cruces da primeira rolda do play off polo título son: Conectabalear Manacor-
Melilla Sport Capital, Teruel-Guaguas e Feníe Energía Mallorca-Río Duero Soria.
